روايه ابن اسموديوس 2 الفصل الخامس (رحله اللاعوده)

 روايه ابن اسموديوس 2

 الفصل الخامس

 (ضيف جديد)

بيتر:يابني اهدي شويه وحاور ترتاح انت لسه مسترجعتش نص قوتك حتي 

نبيل:اسمع كلام بيتر يا عاصم وبلاش عند 

عاصم:انتم محدش فيكم حاسس بالنار اللي جوايا

بيتر: يعني هي العصبيه دي اللي هتحل الامور يعني ؟

عاصم:وايه اللي هيحل الامور ،ايه اللي المفروض يرجع لي منى ولا هو خلاص كده راحت مني 

بيتر: لازم نتقبل كده لان مفيش حل تاني

عاصم ناظرا الي نبيل: لا فيه 

نبيل:عاصم انت عارف ان مجرد التفكير انك تروح لهم برجلك هناك ليها معني واحد بس (الانتحار)

هم عاصم في الرد لكن قاطعه بيتر: افهم يا عاصم خلاص فات الوقت 

عاصم وقد ارتسمت عليه وجهه علامه الحزن: مينفعش يا بيتر لازم يكون فيه حل مينفعش اتخلي عنها لو انت اللي مكانها كنت هتقبل اتخلي عنك؟ 

نبيل: ياعاصم انت عارف في تاريخ عالم السفليات كله مفيش  حد عدي الباب بينا وبينهم بدون اذن الا واتعاقب وكان ابسط عقاب له انه يفضل محبوس هناك للابد 

عاصم: طب محنا ممكن نطلب الاذن 

بيتر ونبيل ينظران وقد ارتسمت علي اعينهم علامه الحيره وعدم الفهم

عاصم:  افهمكم، ببساطه خالص احنا كل اللي محتاجينه دعوه للعالم الاخر صح؟ يعني لو فيه دعوه لينا نقدر نروح ونرجع 

نبيل: لا مش بالسهوله دي اللي بيقدر يتنقل بين العوالم دي مبيبقاش اقل من جنرال من الجن ومن القمريين كمان مش اي حد 

عاصم: طب مهو هو ده اللي انا عاوزه بالظبط، نعمل تحضير لحد منهم

نبيل: يابني الفصيله دي من الجن قويه جدا ومش بالساهل كده اننا نحضرهم، ثم انا حتي بعد كل السنين دي مقدرتش اوصل لتحضير  جندي عادي حتي من القمريين ما بالك واحنا بنتكلم عن جنرال 

عاصم: يبقي لازم ندور ونشوف انا حاسس ان لسه الوقت مفاتش ولسه فيه امل

بيتر: يعني المفروض نعمل ايه دلوقتي؟ 

عاصم: ندور علي طريقه تخلينا نحضر اللي يقدر يساعدنا ويفتحلنا الباب

نبيل: انا مش متفائل 

بعد مرور يومين......... 

نبيل: يا عاصم احنا لفينا كل شبر في مصر كلها علي التعويذه دي ومش لاقينها 

بيتر: ايوه يا عاصم دا احنا مش ناقص غير اننا نروح للوسيفر نفسه نقوله هاتلنا التعويذه 

عاصم بانفعال وكأنه وجد ضالته:  لقيتها.. 

بيتر ونبيل:  تاااااني

في شقه معتز... 

بيتر: دور كويس بس هو اكيد مخبيهم في مكان هنا ولا هنا

عاصم: انا عايز اعرف بس طالما انت جيت هنا وشوفت الكتب دي قبل كده مخدتهاش معاك ليه ولا حتي حرقتها؟ 

بيتر:  لا يا عم اخاف اتلبس 

نبيل: يعني انت خايف تتلبس واللي احنا فيه دلوقتي ده عادي يعني  بحارب شياطين ومعانا الاخ نصه شيطان وبيطلع نار من بؤقه كل ده وعادي يعني

عاصم: اهدي شويه يا نبيل، بلاش مبالغه نار ايه اللي بطلعها من بؤقي هو انا تنين

بيتر:  لقيته اهوه

نبيل وعاصم بنظره سذاجه وقد سقط فكهم السفلي 

نبيل:  ه هوا هوا دا اللي في بالي، الكتاب ده حقيقي مش مزيف؟  

عاصم انا اتوقعت ان معتز مش سهل انه يحضر تعويذه بالقوه دي بس متخيلتش ابدا انه يكون عنده الكتاب ده

نبيل: انت متخيل الليفل اللي وصلنا ليه  ،  شمس المعارف الكبري،  يعني احنا في ايدنا دلوقتي اندر كتاب سحر اسود وطلاسم علي مستوي الكوكب كله،  لحظه كده وانت يا بيتر الزفت ازاي تبقي عارف طريق الكتاب ده ومتفكرش تاخده او حتي تخبيه

بيتر:  انهو جزء في جمله كنت خايف اتلبس انت مش فاهمه؟ 

عاصم: سيبك منه دا هيشلنا كلنا بمستوي ذكائه،  المهم اكيد هتلاقي الطلاسم اللي محتاجنها هنا

نبيل: اكيد، اديني دقايق بس وانا اوصل