اهم النصائح قبل دخول الانترفيو

النصيحة الاولى والاخيرة فى اى Interview، خليك بياع..!

الراجل بتاع التوظيف..

اللى هو ال HR .. ده مش راجل رخم، لكن هو بني ادم بيكره وبيحب..

فيه 10 نقاط مهمين لازم نعرف منهم الراجل ده هو بيكره ايه + أبدلهم ب ايه ؟ :

-

1. الراجل ده بيكره انك متعرفش تبيع نفسك لما يقولك (Introduce yourself)، لانك لو معرفتش تبيع نفسك ومهاراتك مش هتعرف تبيع خدمة الشركة اللى انت جاي تشتغل فيها..

..

2. بيكره انك (تهبد) فى إجابة سؤال متعرفهوش، لكن بيتبسط لما تقوله (الحقيقة معرفش اجابة السؤال ده وانا مش بحب اقول معلومه الا لو متاكد منها)..

..

3. بيكره انك تقوله انا هسمع الكلام ومش هتصرف من دماغى، لكن بيحب جدا انك تقوله انا Creative وهبتكر بالطريقة الفلانيه وهبدع بالطريقة العلانيه وهعملك من الهواء فلوس..

..

4. بيكره انك تقوله (انا بحب الفلوس)، لكن يحب جدا انك تقوله (انا محتاج الفلوس عشان اوصل للخطه بتاعتى) فالفلوس جزء وخطوة من الخطه..

..

5. بيكره انك توصف له نفسك انك مفيش منك اتنين فى الCV وتكتب له مسوده 4 صفحه .. لكن قدامه تقلب (بطه بلدى) ومش عارف تتكلم، لكن يحب جدا العكس..

..

6. بيكره انك تكدب فى اجابة سؤال عشان توصل، لكن بيحب انك تصارحه مع التركيز فى اختيار الكلمات الل هتصارحه بيها..

..

7. بيكره لما يقولك سؤال (شايف نفسك فين كمان 5 سنين) انك ترد عليه ب (انا بحلم ب..... - بحلم اكون....) ، لكن بيحب جدا انك تبدلها ب (انا بخطط اوصل ل.... خلال وقت كذا)

..

8. بيكره انك تلف وتدور حولين الاجابة، لكن بيحب انك تظهر له انت فاهم قد ايه من الاجابة..

..

9. بيكره انك تبقا جاي (الانترفيو) مش باحث عن الشركة ولا حتى باحث عن الوظيفه، لكن بيحب جدا انك لما تتكلم تقوله مصطلحات لها علاقة بالوظيفة..

..

10. بيكره انك تنسا اسمه.. اوعي تنسا اسمه.. اوعا تنسي تدور عليه قبل ما تروح المقابله..

--

واخيراً : اختار كلامك بدقة.. بلاش سرعه وبلاش فتي..

خلصانه ب Accepted بعون الله..