ابن اسموديوس ٢
الفصل الثالث
(رحله الي العالم المظلم)
عاصم:برضو مش لاقي حد فوق
بيتر: لفيت السطح كله ملقتش لهم اثر مش عارف راحوا فين دول
عاصم:مش عارف لكن مش مرتاح
بيتر:طب متعرفش تستخدم قوتك تعرف هم فين؟
عاصم:منت لو قادر استخدمها كنت هستني رأيك يعني ،في حاجه منعاني استخدمها مش فاهم هي ايه
بيتر: ازاي يعني من امتي الكلام ده ؟
عاصم:من 3 ايام تقريبا من وقت المشكله مع مني
فجأه لفت انتباه عاصم شئ: بيتر لو الطاقه بتاعتي مش قادر استخدمها من وقت الخناقه مع مني يبقي اكيد كل ده له علاقه ببعضه
قطع كلام عاصم صوت هاتف محمول يرن كان هاتف بيتر
بيتر: ايوه يا نبيل ،لا معلش مشغول شويه مع عاصم ،لا مفيش حاجه
اشار له عاصم انه يخبر نبيل بالحضور
بيتر: بقولك ايه يا نبيل متيجي تعدي عليا عند بيت عاصم كده هبعتلك العنوان،تمام مستنيك
بيتر: ايه يا عاصم عايز ايه من نبيل في وقت زي ده
عاصم:لما يجي هتعرف بقي
حضر نبيل وفتح له بيتر الباب
نبيل : ازيكم يا شباب ،خير يا سي بيتر عايز ايه
عاصم: نبيل انت قولت ان تخصصك دراسه الاحداث الغير طبيعيه صح؟
نبيل : اسمه علم دراسه الماورائيات
بيتر: يا عم خلاص يعني غلطنا في البخاري
عاصم: بخاري؟ انت متأكد انك مسيحي يابني ؟ تايه من مين ده ؟
نبيل: انا جيت لقيته الصراحه تعرفه؟
عاصم : ولا اعرفه امشيطلعيبرا يا بواب
بيتر: جرا ايه يا حلو انت وهو ،بلاش تحلوا عليا هاا وانجز يا سي زفت كنت عايز نبيل في ايه؟
عاصم: نبيل انت مجال دراستك شغل الجن وكده طيب هل تفهم في حوار التعاويذ والاحجبه وكده؟
نبيل : هو اه ولا
بيتر: انت تقرب لعمرو دياب؟ عايش ومش عايش
عاصم: انا قولت يمشي من الاول محدش سمع كلامي ،انكتم بقي الله يحرقك، وانت يا نبيل اه ولا يعني ايه ؟
نبيل : بص هو انا مش عارف انا فيه حاجات كتير بلاقي نفسي عارفها بخصوص المجال ده لكن معرفش اتعلمتها امتي ولا منين يعني انا مثلا مره قدرت اعمل حجاب قوي جدا لدرجه انه منع جنرال كبير جدا في جيش الملك الاسود نفسه
بيتر : مين الملك الاسود ده؟ ايه يا عاصم بتبصلي كده ليه بسأل ياعم
عاصم: اسكت يابابا اخرس شويه سيبه يتكلم ،مين الملك الاسود ده ؟
نبيل: دا ملك من ملوك الجن الشيطاني له علاقه بشهوه الحسد
عاصم : اه فهمت تمام كمل
نبيل: المشكله بقي مش في التعويذه المشكله اني معرفش لحد دلوقتي انا اتعلمتها امتي وفين وازاي عملتها بالاتقان ده مع اني مجربتهاش قبل كده
عاصم: طيب نشوف الحوار ده بعدين، دلوقتي انا عايز منك خدمه
نبيل: لو اقدر اساعد مش هتأخر طبعا
عاصم: عايز تعويذه ايضاح
بيتر: يعني ايه تعويذه ايضاح دي؟
نبيل: دي تعويذه شبه نظام البحث علي جوجل كده بتبحث منه عن اي حد في ايه مكان في الكوكب دا نفسه اللي بتعمله التعويذه دي
عاصم: حلو انا بقي عايز التعويذه دي انا ملحقتش اتعلم عنها كل حاجه فشوف تقدر تعملها ولا لا
نبيل: هحاول انا مجربتاش قبل كده، بس خلي بالك يا عاصم التعويذه دي لو اتعملت علي انسان ممكن تموته لانها بتستنفذ طاقه الانسان كلها ،ولو مات يبقي حظه حلو لان اللي بيعيش بعدهت بيفقد عقله نهائيا وبيدخل في هيستريا فزع مستمره
بيتر: ايه يا عم خلاص انت ما صدقت تتكلم ولا ايه؟ ،عاصم اوعي تكون ناوي تعمل اللي في بالي
عاصم: عندك حل تاني؟
بيتر: اه عندي ندور اكتر ونبلغ البوليس
عاصم: بيتر انت اكتر واحد فاهم احنا بنتعامل مع ايه ومين بالظبط تفتكر دول ينفع معاهم بوليس
بيتر: مهو متفهمنيش انك لما تعرف المكان هتروح تقتحمه وتحرر حبيبتك والجو الهندي ده ،فوق يا حبيبي الكلام ده في الافلام بس خصوصا انك مش معاك قوتك
نبيل: لا معلش انا مش فاهم حاجه ،هو ايه اللي بيحصل هنا ده بالظبط
عاصم: هحكيلك عن كل حاجه بس تسمعني للاخر وتوعدني انك تساعدني
نبيل: اوعدك يا سيدي فهمني بقي
حكي له عاصم كل الامر من بدايته حتي اختفاء مني
نبيل: لحظه بس معلش هو انت عايزني اصدق الكلام الاهبل ده؟
بيتر: مجال دراستك اللي مضيع فيه عمرك كلام اهبل يا دكتور؟
نبيل: يا عم ماشي بس كله كلام نظري وادله قليله مفيش حاجه اكيده
عاصم: هتساعدني ولا لا
سكت نبيل قليلا يفكر ثم أجاب
نبيل: حتي لو وافقت اساعدك وعملتلك التعويذه عشان تلاقي مراتك واختها زي ما انت عايز ،هنستفاد ايه منت ممكن تموت اصلا ومترجعش لعقلك تاني من اللي هتشوفه
عاصم: الكلام ده مع انسان عادي يا نبيل ، انا نص بشري ونص جن ،وغير كل ده انا بخلي مسؤوليتك من اي حاجه تحصلي
نبيل: خلاص يا عاصم موافق، تحب امتي
عاصم: دلوقتي حالا ،محتاج مواد او حاجه تساعدك تعملها؟
نبيل : لا هاتلي بس قلم اسود تقيل ومكان فاضي من اي اثاث
عاصم: تمام تعالي في صاله الشقه التانيه
نبيل: بيتر خليك انت بره وانا هخلص واناديلك
جلس عاصم علي كرسي في منتصف الصاله وقد اغلقت كل الابواب واستمر نبيل برسم طلاسم ورسومات علي الارض وعاصم جالس وسط هذه الطلاسم التي تمتد لتشير الي قدمه
نبيل:هتقول (اوم دي نافروزر روج الجن تي برنج ان ماي تي بيسيت)
عاصم: تمام
نبيل انا هخرج انا
وبمجرد خروج نبيل واغلاق الباب بدا عاصم بقرائه التعويذه التي عندما وصل لنصفها انطفئت الاضواء وبدأت الطلاسم الموجوده علي الارض بالاضاءه كأنها مصنوعه من الفسفور المضئ وفجأه ارتفع عاصم في الهواء ليرتطم بسقف الصاله وعادت الاضواء من جديد
فتح نبيل وبيتر الباب واسرعوا الي عاصم الذي وجدوه مستلقي علي الارض
بيتر: عاصم عاصم فوق يا عاصم
عاصم محاولا التحدث بصعوبه :اخدوها يا بيتر اخدوها بسببي
واغمي عليه من جديد
نبيل :بيتر ادخل هاتلي مرتبه السرير من جوا نريحه عليها عشان مينفعش نحركه وهو كده
){kind=link}
0 تعليقات